Í umfjöllun Morgunblaðsins kemur fram að ferðaþjónustuaðilar sem blaðið ræddi við séu sammála um að hátt verð á hótelgistingu spili stórt hlutverk í því að færri ferðamenn koma hingað til lands í ár en búist var við. Dæmi hafi verið um að heildsölum hafi verið boðin hótelherbergi á 50 til 100 þúsund krónur nóttin í fyrrasumar. Segir Guðmundur að ferðamenn séu farnir að velja sér aðra áfangastaði en Ísland sökum verðlagningar hér á landi.
„Við höfum upplifað í svolítinn tíma, bæði hjá hópum og einstaklingum, að fólki finnst Ísland orðið of dýrt. Það kýs frekar að fara til Noregs, sem er ekki ódýrt land, eða Svíþjóðar eða Finnlands. Hótelverð er oft lagt til grundvallar þegar kemur að skipulagningu ferða og menn hér á landi hafa farið algjör offari þar. Auk þess hjálpar óheft ýmiss konar gjaldtaka, svo sem á bílastæðum og ferðamannastöðum, ekki til og gerir ferðir til landsins enn dýrari. Það er orðið mun erfiðara að selja landið á þessum verðum,“ segir Guðmundur í samtali við Morgunblaðið.
Hann bætir við að hann sé hissa á umræðunni hér á landi og menn séu duglegir að finna aðrar ástæður þegar ekki gengur vel, til dæmis jarðhræringar á Reykjanesskaganum. Guðmundur segir að fá dæmi séu um slíkt.
„Við erum bara orðin of dýr. Kúnnarnir mínir koma til dæmis frá Þýskalandi og Sviss. Þetta er fólk sem á peninga en er engir milljónamæringar. Það segir að Ísland sé frábært land og það vilji senda hingað hópa en þegar verð og gæðastuðullinn er ekki að dansa saman eru einhver takmörk á því hvað það er tilbúið að borga til að fara til þessa undurfagra lands,“ segir hann við Morgunblaðið þar sem nánar er fjallað um málið.