Pep Guardiola, stjóri Manchester City, viðurkenndi í gær að það væri óljóst hvor markvörðurinn Ederson verði áfram í herbúðm félagsins á næstu leiktíð.
Ederson hefur verið sterklega orðaður við sádiarabíska félagið Al-Ittihad og er talið að hann sé þegar búinn að semja um eigin kjör þar.
Félögin þurfa þó að ná saman en City vill um 50 milljónir punda fyrir Brasilíumanninn.
„Ég myndi vilja hafa hann áfram en það fer eftir öðrum. Ég veit ekki hver staðan er, það hafa ekki átt sér stað viðræður síðustu daga. Hann þarf að æfa og vera með okkur þar til félagaskiptaglugginn lokar og þá sjáum við hver staðan er,“ sagði Guardiola eftir 4-3 tap gegn Celtic í æfingaleik í gær.
Fyrr í vikunni sagði Fabrizio Romano frá því að City myndi ekki fá inn markvörð til að leysa af Ederson, heldur treysta á varamarkvörðinn Stefan Ortega.