Erik ten Hag, stjóri Manchester United, vill fá sinn fyrrum leikmann frá tímanum hjá Ajax til að aðstoða kantmanninn Antony. Times fjallar um málið.
Antony kom til United fyrir tveimur árum en hefur átt erfitt uppdráttar á Old Trafford. Hann starfaði áður með Ten Hag hjá Ajax.
Það gerði bakvörðurinn Noussair Mazraoui einnig, en hann gekk í raðir Bayern Munchen um svipað leyti og Ten Hag og Antony fóru til United.
Mazraoui er nú orðaður við United en talið er að hann kosti um 17-21 milljón punda.
Times segir að Ten Hag hafi trú á því að það gæti breytt miklu fyrir Antony ef hann sameinar hann Mazraoui á ný á hægri hlið vallarins.
Ten Hag er á leið inn í sitt þriðja tímabil með United, en mikil óvissa var um framtíð hans í stjórastólnum þar til í sumar.