Baráttumaðurinn og samfélagsrýnirinn Unnar Karl Halldórsson, framkvæmdastjóri Lóðaþjónustunnar, er fallinn frá aðeins fimmtugur að aldri. Hann lést á Landspítalanu þann 20. júlí síðastliðinn.

Unnar Karl vakti mikla athygli fyrir pistlaskrif sín en þar lét hann rækilega í sér heyra varðandi jafnrétti kynjanna og barðist gegn kynbundnu ofbeldi í hvívetna. Var hann sérstaklega gagnrýnin á íþróttahreyfinguna en innan hennar sagði hann kynferðisofbeldi þrífast í skjóli þagnar og rangfærslna. Þá var hann reglulegur gestur í ýmsum hlaðvörpum og viðtalsþáttum þar sem hann lét skoðanir sínar í ljós, tæpitungulaust.

Sjá einnig: „Hvað í fjandanum erum við svona hræddir við?“

Má leiða að því líkum að það hafi vakið eftirtekt að grjótharður iðnaðarmaður með bakgrunn úr hnefaleikum, en Unnar Karl var formaður Hnefaleikafélags Reykjavíkur um tíma og vann þar mikið starf, hafi verið með svo ástríðufullar skoðanir á jafnréttismálum.

Húðskammaði kynbræður sína og hvatti þá til að standa með konum

Til að mynda húðskammaði Unnar Karl þá karlmenn sem gagnrýndu kvennaferkfallið sem fór fram í fyrra og ítrekað þá skoðun sína að typpi ættu ekki að tryggja hærri laun.

„Karlmenn, hættum þessu rugli og kvörtunum yfir því að konurnar okkar séu að fara fram á sama rétt og við. Hættum að bulla þetta með að þær séu ekki „allar á sjónum og byggi ekki hús. Það er enginn að tala um þetta og það er enginn að dælda egóið okkar. Drullum okkur á lappir og stöndum með þeim í þeirra baráttu. Þær eiga það skilið og við vitum það. Eða finnst öllum að konan þeirra, mamma og dóttir eigi að vera lægri launaðar en hvaða plebbi útí bæ sem er, bara af því að hann fæddist með typpi? Látið ekki atvinnurekendur segja ykkur að konurnar okkar séu annars flokks,“ skrifaði Unnar Karl við það tilefni.

Rödd hans náðist í gegn og er hans meðal annars minnst í Facebook-hópnum Baráttuhópur gegn ofbeldismenningu þar sem margir meðlimir syrgja fráfall baráttumannsins.

Unnar Karl lætur eftir sig eiginkonu, G. Helgu Jónasardóttur, og þrjú börn.