Söngkonan Margrét Rán gefur út sitt fyrsta lag undir listamannsnafninu RÁN næstkomandi föstudag. Lagið sem heitir Gleðivíma er lag Hinsegin daga 2024, og með RÁN í laginu syngur poppkonungurinn Páll Óskar.
,,Lagið er með fallegan boðskap og bullandi stemningu sem tekur mann beint niðrí miðbæ Reykjavíkur í Pride gleðina!“
Af hverju RÁN?
,,Ég heiti Margrét Rán og dóttir mín heitir Enea Rán svo mér fannst það spennandi valkostur og nafnið táknar auk þess alda og sjávargyðja sem mér finnst frekar sjarmerandi. En það er yndislegt að fá að vera í Vök og GusGus og þar er nóg framundan en ég þarf að fá að fullnægja sköpunargleðinni í mér. Ég hlakka mikið til að sjá hvert RÁN tekur mig, þetta er verkefni sem ég ætla ekki að taka of alvarlega og ekki ofhugsa. Mig langar bara að gefa út fjölbreytta tónlist og hafa engar takmarkanir þegar það kemur að tónlistarstefnu.“
3D myndin af RÁN er unnin af Jakobi Hermannssyni frá Strik studio og tekin af Elísabetu Blöndal.
,,Myndin er unnin út frá styttunni af Ingólfi Arnarsyni á Arnarhóli. Ég fór á mitt fyrsta Pride og þá endaði Pride gangan alltaf á Arnarhóli þess vegna fannst mér þetta brilliant hugmynd. Ég var alltaf að sjá fyrir mér mig í einhvers konar brynju með fánann en hvernig skyldi ég útfæra það? Svo ég fékk þetta hæfileikaríka teymi með í lið og útkoman er sturluð.“
Lagið kemur eins og áður segir út á föstudag.