Íslensk hjón geta ekki gengið frá sölu á húsinu sínu vegna þess að útlent fólk sem þau þekkja ekki til, tveir einstaklingar, hafa skráð lögheimili sitt á húsið.

Maðurinn kom fram nafnlaust á Bylgjunni í morgun.

„Við hjónin erum búin að eiga hús í þrjú ár sem við höfum verið að leigja út. Svo gerðist það nú að leigjendurnir sögðu upp leigunni og fluttu út. Þá vorum við að velta fyrir okkur hvort við ættum að leigja áfram eða selja og við ákváðum að selja húsið,“ segir maðurinn en hann segist hafa kannað af rælni á heimasíðu Þjóðskrár lögheimili á húsinu og séð þá að þar voru þrír einstaklingar skráðir með lögheimili, leigjandinn fyrrverandi, og tvö önnur sem hann kannast ekki við.

Leigjandinn hafði þá skráð, án samþykkis eigandans, tvær manneskjur með lögheimili í húsinu. Eftir að maðurinn hafði samband við leigjandann afskráði hann nafn sitt af húsinu en sagðist ekki geta afskráð hitt fólkið þar sem það væri án lögheimilis.

Húseigandinn hafði samband við Þjóðskrá og fyllti út staðlað form til að ógilda lögheimili fólksins en afgreiðslutíminn er afar langur. Eftir að maðurinn hafði beðið í tvo mánuði eftir úrlausn hjá Þjóðskrá var honum tjáð að hann gæti þurft að bíða í hálft ár í viðbót. Ástæðan væri sú að Þjóðskrá væri með hátt í fjögur þúsund mál af þessu tagi í vinnslu, þar sem fólk situr uppi með að einhver hefur skráð lögheimili á eignina og ekki hægt að fjarlægja viðkomandi af henni.

Maðurinn segir að honum sé haldið í herkví. Þau hjónin hafi verið búin að selja húsið er fasteignasalinn hafði samband og sagði að ekki væri hægt að skrifa undir kaupsamning fyrr en búið væri að afskrá lögheimili fólksins af henni.

Ókunnuga fólkið hefur andmælarétt sem tefur vinnslu málins. Maðurinn segir að annaðhvort sé Þjóðskrá undirmönnuð eða lög og reglur um þessi mál séu ekki nógu skýr.

Nánar má heyra um málið á Bylgjunni.