Bræðurnir Tony og Lloyd Romeo telja sig hafa fundið púslið sem gæti loks leyst eina dularfyllstu ráðgátu flugsögunnar: Hvað gerðist fyrir goðsögnina Amelíu Earhart? Bræðurnir, sem reka djúpköfunarfyrirtækið Deep Sea Vision, telja sig hafa fundið flak flugvélar Earhart, skammt frá Howlandeyju í Kyrrahafinu, sem er afskekkt eyðieyja sem tilheyrir Bandaríkjunum.
Flugvélarinnar hefur verið leitað í 87 ár eða allt frá því að Earhart hvarf, ásamt siglingafræðingnum Fred Noonan, þegar hún var að freista þess að verða fyrst kvenna til að fljúga hringinn í kringum hnöttinn.
Sást vélin síðast nálægt Howlandeyju þann 2. júlí 1937 en frumstæð flugbraut var á eyjunni sem hafði verið byggð upp með það að markmiði að flugvélar á leið milli Ástralíu og Bandaríkjanna gætu tekið þar eldsneyti. Var það einmitt ætlun Earhart og Noonan en þangað komust tvímenningarnir aldrei.
Örlög Earhart hafa verið sveipuð ævintýraljóma í gegnum tíðina og margar kenningar verið á lofti. Því hefur verið haldið fram að Earhart og Noonan hafi verið tekin höndum af Japönum og látist í þeirra haldi. Farist í brotlendingu vélarinnar sem og lifaði slíkt slys af en dáið bjargarlaus á einhverjum af eyðieyjunum í kring.
Sú kenning hefur verið lífsseig í ljósi þess að á Gardner-eyju, sem er um 400 sjómílum frá Howlandeyju, fundust líkamsleifar árið 1940 sem gætu hafa verið af Earhart. Mannabeinin týndust hins vegar og aldrei tókst að rannsaka almennilega af hverjum þau voru.
Eins og gefur að skilja hafa Romeo-bræður ekki gefið upp staðinn þar sem þeir telja sig hafa fundið flugvél Earhart. Staðurinn sé í 100 sjómílna radíus í kringum Howlandeyju en fyrirtæki þeirra hafi farið í langan túr í september á síðasta ári og myndað sjávarbotninn allt í kringum eyjuna.
Langan tíma hafi tekið að vinna úr myndunum en loks hafi þeir fundið þúst á sjávarbotni sem lítur út eins og flugvél. Það sem meira er þá stemma hlutföll hinnar mögulega flugvélar nákvæmlega við flugvél Earhart sem var af gerðinni Lockheed Electra.
Bræðurnir segja spenntir fyrir því að halda í annan leiðangur þar sem frekari rannsóknir fari fram og síðan verði allt sett á fullt við að reyna að ná vélinni aftur upp á yfirborðið.