Yana Sana, kona með íslenskan ríkisborgararétt sem bjó á Íslandi árum saman, varð í vikunni fyrir hrottalegri árás á veitingastað á Krít í Grikklandi ásamt fjölskyldu sinni, eiginmanninum Emmanuel Kakoulakis, sem er grísk-kanadískur að þjóðerni, og þremur börnum hennar, tveimur piltum og einni stúlku. Hrottafengin og tilefnislaus árás hóps ómenna á fjölskylduna hefur vakið mikinn óhug.
DV ræddi málið við Yönu í vikunni og son hennar Thomas, sem hlaut töluverða en þó ekki hættulega áverka í árásinni. Thomas er að hluta til alinn upp á Íslandi og talar íslensku, en býr núna í Danmörku.
Emmanuel gekkst undir sex klukkustunda langa aðgerð á sjúkrahúsi á Grikklandi á föstudag. Samkvæmt heimildum frá Yönu og Thomas gekk aðgerðin vel. „Aðgerðin gekk vel, hann er að hvíla sig núna og getur ekki talað næstu 3-5 daga,“ sagði Thomas við blaðamann DV í gær.
Áður hefur komið fram í grískum fjölmiðlum að einn árásarmaður hafi verið handtekinn. Aðspurður segir Thomas að hinir árásarmennirnir séu enn á flótta og ekki hafi fleiri verið handteknir.
Yana segir í samtali við DV að hún hafi engar frekari upplýsingar um árásarmennina enda hafi hugur hennar verið hjá Emmanuel og bata hans. „Guði sé lof þá gekk aðgerðin vel. Hún tók sex tíma og læknarnir unnu frábært starf. Þeir púsluðu andlitinu á honum aftur saman, ótrúlegir læknar! Hann er núna í bataferli sem mun að sjálfsögðu taka tíma, en við látum sjúkrahúsið ráða ferðinni. Við munum dveljast hér eitthvað áfram.“
Yana segir að fjölskyldan muni höfða miskabótamál vegna árásarinnar og hafa þau ráðið til þess lögmann. Þau þakka fyrir batakveðjur sem þau hafa fengið frá Íslandi og lýsa yfir ánægju með umfjöllun fjölmiðla um málið.