Fólk úr herbúðum Joe Biden Bandaríkjaforseta segja að forsetinn sé farinn að horfast í augu við stöðu sína og það að þurfa líklega að hætta við framboð sitt.
Hann mun þó ekki hafa gert upp hug sinn enn sem komið er, en er þó ekki eins staðráðinn í að halda framboði sínu til streitu og áður. Einn sagði að fólk ætti ekki að láta sér koma á óvart ef Biden tilkynni fljótlega að hann ætli sér að stíga til hliðar og styðja við framboð varaforsetans, Kamala Harris.
Fyrst og fremst megi rekja þetta til þess þrýstings sem áhrifamiklir samflokksmenn hafa beitt forsetann undanfarna daga. Þetta er fólk á borð við fyrrum forseta fulltrúadeildar Bandaríkjaþings, Nancy Pelosi, og svo fyrrum forsetans Barack Obama. Eins hafi nýlegar skoðanakannanir sýnt að dregið hefur úr sigurlíkum Bidens og loks hafa margir stórir styrktaraðilar demókrata snúið baki við forsetanum.
Biden sé nú undir feldi og að ýmsu þurfi að hugsa, svo sem hvenær rétti tíminn væri að stíga til hliðar.
NBC fréttastofan segir að Biden sé að ráðfæra sig við fjölskyldu sína um hvernig best væri að stíga til hliðar. Talsmaður Hvíta hússins, Andrew Bates, þverneitar þó að forestinn sé á förum.
„Þetta er ekki að eiga sér stað. Fólkið sem er að halda þessu fram tala ekki fyrir fjölskyldu hans eða kosningateymið og fullyrðingar þeirra munu sanna sig sem rangar með tíð og tíma.“