Bandaríski blaðamaðurinn Evan Gershkovich hefur verið dæmdur fyrir njósnir í Rússlandi og hlaut 16 ára fangelsisdóm. Bandarísk stjórnvöld segja að um sýndarréttarhöld hafi verið að ræða.
Gershkovich, sem er 32 ára gamall, starfaði í Rússlandi sem blaðamaður Wall Street Journal þar í landi. Hann var handtekinn í mars í fyrra, öllum að óvörum, og í kjölfarið ákærður fyrir njósnir, fyrstur bandarískra blaðamanna síðan á dögum kalda stríðsins. Var Gershkovich gefið að sök að hafa njósnað, að undirlagi bandarísku leyniþjónustunnar, um rússneskt fyrirtæki sem framleiðir skriðdreka.
Gershkovich hefur þráfaldlega neitað sök en réttarhöldin yfir honum gengu hratt fyrir sig. Telja sérfræðingar að Rússar hyggist bjóða Bandaríkjamönnum upp á fangaskipti á Gershkovich og einhverjum aðilum sem eru í haldi Bandaríkjamanna. Dmitry Peskov, talsmaður stjórnvalda í Kreml, vildi ekki svara spurningu um slíkt á blaðamannafundi fyrr í dag.