Bandarísk kona af víetnömskum uppruna er talinn hafa drepið fimm fjölskyldumeðlimi sína á lúxushóteli í Bangkok með því að byrla þeim blásýru og síðan framið sjálfsmorð því að innbyrða eitrið sjálf. Málið hefur vakið mikla athygli, innan og utan Tælands, en núna telur lögregla sig hafa nokkuð rétta mynd af því hvað gerðist.
Hin 56 ára gamla Sherine Chong er talin bera ábyrgð á ódæðinu. Chong hafði boðað ættingja sína til fundar við sig á hótelinu til þess leysa úr vandamáli sem sneri að því að hún hafði ættingja sína til þess að fjárfesta stórfé í verkefni varðandi uppbyggingu spítala í Japan. Verkefnið fór hins vegar illa og gerði það að verkum að ættingjarnir töpuðu um 40 milljónum króna.
Þá fjárhæð vildu ættingjarnir fá endurgreidda en Chong vék sér undan því. Að endingu virðist hún hins vegar hafa gripið til þess óhugnalega örþrifaráðs.
Fólkið, þrír karlmenn og tvær konur, hitti Chong á Grand Hyatt Erawan-hótelinu í Bangkok til þess að útkljá málið. Matur var pantaður upp á herbergið en fólkið virðist varla hafa snert á honum. Þá pantaði Chongeinnig te upp á herbergið en afþakkaði þjónustu hótelsstarfsfólks um að hella upp á. Í kjölfarið virðist hún hafa hellt upp á drykkinn göróttae og þegar að fólkið var látið virðist Chong hafa sjálf innbyrt hinn banvæna drykk.
Málið hefur vakið gríðarlega athygli í Tælandi og utan landssteinanna og hefur Srettha Thavisin, forsætisráðherra Tælands, til að mynda látið til sín taka varðandi málið. Ferðaþjónustan er enda ein af lífæðum Tælands og vilja ráðamenn tryggja að málið varpi ekki skugga á það fjöregg. Thavsin staðfesti að fulltrúar bandarísku leyniþjónustunnar, FBI, væru á leið til landsins til að rannsaka málið og tryggja að tælensku lögreglunni myndi ekki yfirsjást neitt.