Jackass stjarnan og Íslandsvinurinn Bam Margera fagnaði á þriðjudag, 16. júlí, þegar dómari í Kaliforníu komst að þeirri niðurstöðu að Bam og Nicole Boyd hefðu aldrei verið gift. Giftingin fræga í Hafnarhúsinu í Reykjavík í október árið 2013 var ógild.
Eins og breska blaðið Daily Mail greinir frá hafa Bam og Nicole staðið í mjög harðri forræðisdeilu yfir syni þeirra eftir að þau slitu samvistum árið 2021. Taldi Nicole þau hafa verið gift en Bam ekki en pappírum var aldrei skilað eftir athöfnina á Íslandi.
Athöfnin, sem haldin var í Hafnarhúsinu, var mjög umtöluð enda ekki oft sem erlendar stórstjörnur koma til Íslands til að gifta sig. Bam steig þar á svið með hljómsveit sinni FuckFack Unstoppable og hélt styrktartónleika fyrir hjólabrettagarði í Reykjavík.
Sá sem gaf Bam og Nicole saman var finnskur tónlistarmaður að nafni Andy McCoy, sem svaf reyndar yfir sig í klukkutíma. Ekki er ljóst hvort að Andy hafi hjónavígsluréttindi. Nú er það komið á hreint að þessi athöfn hafði enga lagalega þýðingu enda engin pappírsslóð eftir hana.
„Nicole vissi að við værum ekki gift frá fyrsta degi. Það vissu allir og það eru ekki nýjar upplýsingar,“ sagði Bam í viðtali við vefmiðilinn TMZ. „Vitaskuld vann ég þar sem við vorum aldrei gift. En að borga háar fjárhæðir fyrir fjögurra daga réttarhöld þar sem hún lét eins hún hafi ekki vitað það var tímaeyðsla og verkur í mínum gumpi. En ég er svosum vanur því.“
David Glass, lögmaður Nicole, sagði að hún virti niðurstöðuna en væri ósammála henni. Hugsanlegt sé að dóminum verði áfrýjað til hærri dómstóls.
Það skiptir báða aðila töluverðu máli að fá niðurstöðu í málið. Það er vegna skiptingar búsins og greiðslu makastyrks. Málið hefur enga þýðingu um forræði, umgengni eða meðlagsgreiðslur til sonar þeirra. Nicole er með forræðið en Bam má heimsækja hann undir eftirliti.
Ýmislegt hafði gengið á og Bam meðal annars verið handtekinn fyrir heimilisofbeldi. Bam hefur einnig glímt við áfengis og fíkniefnavanda um langt skeið og verið lagður inn á geðdeild. Hann hefur sakað Nicole um að leyfa sér ekki að hitta son þeirra en hún hefur sagt að hún hafi oft hreinlega ekki þorað því. Í eitt skipti hótaði Bam að reykja krakk þangað til hann dæi ef hann fengi ekki að hitta soninn.
Eins og DV greindi frá í júní hefur Bam þegar gifst annarri konu, Dannii Marie. Giftingarathöfn þeirra fór fram í Nýju Mexíkó sama dag og Bam gaf skýrslu fyrir dómi í Kaliforníu, það er í gegnum Zoom.
Nicole lét hafa eftir sér að henni þætti það sérstakt að Bam veldi að gifta sig ákkúrat þennan dag, en Bam benti á að réttarhöldunum hefði verið frestað. Þetta hafi ekki verið upprunalega planið.
Bam segist nú vera edrú og hafa snúið lífi sínu við. Hann einbeiti sér nú að hinu nýja hjónabandi, að byggja upp samband við son sinn og að vera á hjólabretti.
