Adrien Rabiot er eftirsóttur víða og eru ensk stórlið á meðal áhugasamra, ef marka má ítalska miðla.
Samningur miðjumannsins við Juventus rann út á dögunum og skoðar Frakkinn, sem spilaði alla leiki síns landsliðs á EM, nú möguleika sína.
Liverpool og Manchester United eru sögð á meðal áhugasamra um hinn 29 ára gamla Rabiot og það er Newcastle einnig.
Þá eru félög á Ítalíu áhugasöm. Má þar nefna AC Milan og Napoli.
Rabiot er hins vegar með heldur háar launakröfur og vill um 9 milljónir evra á ári. Ensku félögin hafa meira á milli handanna og gæti það veitt þeim forskot í baráttunni um kappann.