Samtökin Survival International, sem standa vörð um réttindi frumbyggja, birtu í vikunni ótrúlegar myndir af hinum einangraða Mashco Piro-ættbálk, en meðlimir hans hafa lifað djúpt í Amazon-skóglendi Perú og forðast í lengstu lög að komast í snertingu við nútímamanninn.
Stundum hafa þó orðið árekstrar, árið 2012 fannst perúvískur leiðsögumaður, Nicholas Flores, til að mynda látinn með frumstæða ör í hjartastað. Talið er að hann hafi verið drepinn af Mascho Piro-frumbyggjunum.
Stjórnvöld í Perú hafa bannað samskipti við ættbálkinn, sem talinn er telja 750 manns, af ótta við að veirur og bakteríur verði frumbyggjunum að fjörtjóni.
En friðhelgi ættbálksins dularfulla er í hættu. Skógarhöggsfyrirtæki, sem sækjast eftir dýrmætum sedrus- og mahóganívið, eru farinn að fikra sig inn á lifnaðarsvæði frumbyggjanna í Manú-þjóðgarðinum með þeim afleiðingum að frumbyggjarnir hafa orðið sífellt sýnilegri á síðustu vikum. CNN greinir frá.
„Þau eru að flýja frá skógarhöggsmönnum í Perú. Á þessum tíma árs kom þau að fljótinu til þess að næla sér í skjaldbökuegg ( tracajá). Þá finnum við fótspor þeirra í sandinum og ógrynni af skjaldbökuskeljum. Þetta er fólk sem fær engan frið, þau eru óróleg enda alltaf á flótta,“ hefur CNN eftir Rosa Padilha, sérfræðingi hjá frumbyggjaráði kaþólsku kirkjunnar.