Um er að ræða seinni leik liðanna í 1. umferð undankeppninnar, en fyrri leiknum í Norður-Makedóníu lauk 3-2 eftir að Blikar höfðu komist 0-2 yfir.
„Það var mikill hiti og þeir auðvitað veðjuðu lífinu til að koma sér inn í leikinn en mér fannst við bara því miður aðeins missa hugrekkið að spila í gegnum pressuna þeirra og halda í boltann, stjórna leiknum þannig. Við fórum of snemma í langa bolta og að verja 2-0 stöðuna. Við það opnaðist leikurinn meira, þetta var meira fram og til baka. Það var kannski stærsti lærdómurinn úr þessu, að halda áfram að gera það sem virkar og vera hugrakkur.“
Halldór segir að Blikar muni reyni að spila sinn leik og stýra ferðinni á morgun.
„Ég á eftir að sjá hvernig þeir mæta til leiks. Þeir komu í einhverja hálfpressu á okkur síðast og fóru ofar á völlinn. Ég geri ráð fyrir því að þeir fari aftar núna, reyni að hæga á leiknum og verja forskotið. Ég hugsa að þetta verði meiri þolinmæðisvinna en úti þar sem við fengum margar mjög góðar stöður.“
Blikum hefur fatast flugið í Bestu deildinni undanfarið og ekki unnið í þremur leikjum í röð. Eykur það pressuna á að gera vel í þessum Evrópuleik.
„Nei, alls ekki. Þetta er bara annað verkefni. Þegar þessir Evrópuleikir koma, sérstaklega þegar það er ekki leikur í deildinni á milli, er mjög auðvelt að setja alla einbeitingu þangað. Staðan í deildinni er ágæt, það er stutt á milli í þessu og einn sigur getur fleygt þér töluvert nær toppnum. En auðvitað er það þannig að þessi Evrópuverkefni gefa liðum oft boost inn í tímabilið þegar vel gengur og við vonumst til að það verði raunin á morgun,“ sagði Halldór.
Ítarlega er rætt við hann í spilaranum hér ofar.