Héraðsdómur Reykjavíkur hefur dæmt Jón Einar Eysteinsson í sextíu daga skilorðsbundið fangelsi fyrir að hafa í heimildarleysi dreift höfundarréttarvörðu efni Stöðvar 2. Sjónvarpsstöðin ákvað að höfða einkarefsimál á hendur Jóni Einari og fékk viðurkenningu á bótaskyldu hans að auki.
Jón Einar var sakfelldur fyrir að hafa streymt læstum sjónvarpsstöðvum frá árinu 2021 í gegnum síðuna www.iptv-ice.com og rukkað gjald fyrir. Þannig hafi hann valdið fyrirtækinu verulegum fjárhagslegum skaða. Segir í fréttatilkynningu að Stöð2 muni í framhaldinu sækja rétt sinn til bóta og er talið að sú krafa geti numið tugum milljóna króna.
Jón Einar neitaði sök í málinu og líkti starfsemi sinni við einskonar góðgerðarstarf. Hann væri að hjálpa gömlu fólki á Spáni við að ná íslensku stöðvunum, aðallega þó RÚV og erlendum sjónvarpsstöðum. Þá hafi hann aðeins skaffað sjónvarpslykla gegn þóknun til að gera fólki kleyft að ná tengingu við tvær erlendar sjónvarpsveitur, þar sem hægt er að ná íslensku stöðvunum, og ekki hafi verið sýnt fram á það þær borguðu ekki Stöð2 áskriftagjald. Sjónvarpsstöðin ætti því að eltast við sjónvarpsveiturnar en ekki hann.
Héraðsdómur féllst ekki á málsvörn Jóns Einars og sakfelldi hann eins og áður segir. Var honum, auk áðurnefndra refsinga, gert að greiða 1 milljón króna í málskostnað.