Það vakti mikla furðu þegar Olgeir Sigurgeirsson var rekinn úr starfi aðstoðarþjálfara karlaliðs Fylkis í síðustu viku. Einhverjir hafa hneykslað sig á ákvörðuninni.
Rúnar Páll Sigmundsson, þjálfari Fylkis, vildi ekki losna við Olgeir en það var stjórn félagsins sem tók þessa ákvörðun.
„Mér finnst þetta algjört djöfulsins kjaftæði. Mér finnst þetta svo ógeðslega lélegt,“ segir Baldvin Már Borgarson, sparkspekingur og þjálfari FC Árbær, í Innkastinu á Fótbolta.net.
Fáir virðast átta sig nákvæmlega á af hverju Olgeir var látinn fara en Baldvin sagði frá sögu sem hann hefur heyrt um málið.
„Sérstaklega þegar sögurnar sem maður heyrir í kringum þetta séu að Olgeir hafi verið svo harður við einhverja unga leikmenn. Það var það sem ég var að heyra, að hann hafi verið svo grimmur og kröfuharður,“ segir Baldvin enn fremur.