Í færslu á X skýrði Brandon Avedikian, sem býr í Texas í Bandaríkjunum, frá því að hann og eiginkona hans hefðu ákveðið að reka barnapíuna eftir að hún leyfði 4 ára barni þeirra að borða 11 pakka af hlaupböngsum á einum degi.
„Þegar konan mín komst að þessu, spurði hún barnapíuna af hverju hún hefði látið þetta gerast og var svarið: „Hún bað um meira.“ Ég sagði konunni minni að hleypa barnapíunni aldrei aftur nærri börnunum okkar. Enginn, sem er með svona lélega dómgreind, ætti að vera treyst fyrir einhverju verðmætu,“ skrifaði hann.
Milljónir manna hafa lesið færslu hans og eins og alltaf eru margir reiðubúnir til að tjá sig á samfélagsmiðlum. Viðbrögðin við færslu hans eru nokkuð blönduð. Sumir velta fyrir sér hversu mörgum hlaupböngsum dóttirin torgaði í raun og veru. Avedikian skýrði frá því í athugasemdakerfinu að fjölskyldan haldi sig við Black Forest hlaupbangsa sem eru framleiddir úr hreinum ávaxtasafa. Independent segir að samkvæmt upplýsingum á umbúðunum þá séu 70 hitaeiningar og 11 grömm af sykri í einum slíkum hlauppoka.
Ekki liggur fyrir hvernig Black Forest hlauppoka fjölskyldan átti en einn þeirra sem tjáði sig reiknaði út að líklega hafi dóttirin innbyrt 770 hitaeiningar og 121 gramm af sykri ef hún borðaði úr 11 pokum.
Þrátt fyrir að hlaupbangsar séu ekki kjörin næring fyrir börn, þá telja flestir þeirra sem hafa tjáð sig um málið að Avedikian hafi brugðist of harkalega við með því að reka barnapíuna.