Brynjar Níelsson, samfélagsrýnir, er búinn á því eftir goslokahátíð í Eyjum, enda kominn af léttasta skeiði. Segist hann hafa lofað að íhuga vistaskipti á hátíðinni.

„Nú er dvöl minni á Goslokahátíðinni lokið. Samkvæmi og sull dögum saman eru hvorki góð né holl fyrir menn sem eru komnir af léttasta skeiði. Orðið flak lýsir best líðan minni núna og ég finn ekki fyrir neinni samkennd eða manngæsku hjá Soffíu í augnablikinu. Hún segir að ég geti sjálfum mér um kennt og að ég þurfi ekki alltaf að vera háværasti maðurinn í samkvæminu og fara síðastur,“ segir Brynjar í færslu á Facebook, en hugleiðingar hans þar vekja jafnan kátínu og umræðu vina hans á samfélagsmiðlinum.

„Í gærkvöldi hitti ég Sibba skipstjóra, sem mun vera einn af örfáum framsóknarmönnum í Eyjum. Hann tilkynnti mér að ég væri í röngum flokki og hann og Guðni Ágústsson frá Brúnastöðum væru sammála um að ég væri ekkert annað en framsóknarmaður. Mátti skilja hann svo að ég væri blanda af Steingrími Hermannsyni og Jónasi frá Hriflu og því væri ég mesti núlifandi framsóknarmaðurinn, eiginlega á pari við Guðna. Ég lofaði Sibba þegar við kvöddumst að ég skyldi íhuga vistaskipti.“