Lögreglan á höfuðborgarsvæðinu rifjar stundum upp gamla tíma á Facebook-síðu sinni. Nú síðast birti embættið mynd af lögregluskýrslu frá 1940 þar sem greint er frá því að hermenn hafi framið rán á Seltjarnarnesi. Það eitt og sér verður að teljast athyglisvert en það sem hermennirnir stálu vekur þó sérstaka athygli. Tilkynnt var um þjófnaðinn að morgni 8. nóvember 1940. Í skýrslunni segir:

„Föstudaginn 8/11 1940, kl. 07.45 var símað á lögreglustöðina frá Bjargi á Seltjarnarnesi og tilkynnt að þangað hefðu komið 7 hermenn og tekið þar eina tamda gæs og haft hana á burtu með sér. Ég undirritaður fór að sinna þessu ásamt lögr.þj. nr. 19 og enskum lögregluþjóni. Við leituðum að mönnunum en fundum þá ekki og heldur ekki gæsina.“

Undir skýrsluna ritaði Pálmi Jónsson lögregluþjónn.

Það kemur ekki fram í færslunni hvort málið hafi verið rannsakað frekar og hvort að gæsin eða þeir hermenn sem um ræddi hafi nokkurn tímann fundist.

Eins og flestir ættu að vita hernámu Bretar Ísland um vorið þetta ár og því kemur vart annað til greina en að um breska hermenn hafi verið að ræða. Það hefur komið fram í bókum og greinum um ár seinni heimsstyrjaldarinnar á Íslandi að aðbúnaður þeirra hermanna sem hingað komu hafi oft ekki verið upp á marga fiska. Hvort hermennirnir hafi tekið gæsina traustataki vegna kulda og svengdar skal hins vegar ósagt látið.