Bruno Fernandes er áfram nokkuð reglulega orðaður frá Manchester United en nú er óvæntur áfangastaður nefndur til sögunnar.
Þessi fyrirliði Manchester United hefur undanfarið til að mynda verið orðaður við Bayern Munchen. Ítalski blaðamaðurinn Rudy Galletti, sem fjallar reglulega um boltann í Sádi-Arabíu, orðar hann nú við deildina þar í landi.
Það kemur fram að Fernandes sé opinn fyrir því að skoða tilboð frá Sádí, þar sem nægur peningur er í boði, eftir EM í Þýskalandi með portúgalska landsliðinu.
Sádar hafa fylgst með Fernandes í töluverðan tíma og settu sig samkvæmt fréttunum fyrst í samband við hann í nóvember í fyrra.
Fernandes er samningbundinn United þar til 2026 og er talið að hans fyrsti kostur sé að vera áfram á Old Trafford. Peningarnir í Sádí gætu hins vegar heillað.