Enn er margt óljóst varðandi árásirnar en þó er vitað að hópur vopnaðra Íslamista réðst á kirkju og bænahús gyðinga í bæjunum tveimur. Að minnsta kosti 15 létust, aðallega lögreglumenn en prestur var einnig á meðal hinna föllnu.
Talið er að hryðjuverkamennirnir hafi verið ungir menn frá svæðinu en það hefur lengi verið heimavöllur öfgahyggju og öðru hvoru hefur komið til vopnaðra átaka þar. Dagestan var meðal annars arnarhreiður téténíska stríðsins sem braust út 1999.
Fyrr í mánuðinum tóku Íslamistar, sem eru taldir tengjast hryðjuverkasamtökunum sem kenna sig við Íslamska ríkið, gísla í fangelsi í Rostov í suðurhluta Rússlands. Rússneskir sérsveitarmenn felldu alla sex gíslatökumennina.
Kremlverjar hafa áhyggjur af atburðunum í Kákasus enda var þetta stærsta hryðjuverkaárásin þar síðustu 10 ár.
Ástæðan fyrir aukinni spennu og hættu á svæðinu er líklega að mikill munur er á milli héraða í Rússlandi og Moskvuvaldið á í sífellt meiri vandræðum með að halda uppi lögum og reglu í fjarlægum hlutum landsins.
Norðurhluti Kákasus er sérstaklega mikill höfuðverkur fyrir Moskvustjórnina því atvinnuleysið í héraðinu er gríðarlega mikið og samfélagsleg mótmæli hafa yfirleitt trúarlegt yfirbragð. Vaxandi merki hafa verið að undanförnu um aukna öfgahyggju meðal íbúanna.
Talið er að mörg þúsund menn frá Dagestan hafi barist með öfgamönnum í stríðinu í Sýrlandi. Sumir þeirra komust heim aftur og eru nú áróðursmeistarar hryðjuverkasamtaka.