Það vakti mikla furðu þegar Olgeir Sigurgeirsson var rekinn úr starfi aðstoðarþjálfara Fylkis í vikunni. Brottrekstur hans kom flatt upp á flesta.
Rúnar Páll Sigmundsson þjálfari Fylkis vildi ekki losna við Olgeir en það var stjórn félagsins sem tók þessa ákvörðun.
„Ég er ekki að fatta hvað er í gangi, þegar það er ekki komið hreint til dyra þá koma sögusagnir. Þá er haft eftir Rúnari Páli að hann vildi halda þjálfaranum,“ sagði Kristján Óli Sigurðsson í Þungavigtinni í gærkvöldi.
Kristján telur að eitthvað hafi gerst. „Það hefur eitthvað meira en lítið gengið á. Ég þarf að taka einn Óla Þórðar hring í kringum stífluna og finna út úr þessu.“
Olgeir lék með Kristjáni í Breiðablik og segir hann góða dreng. „Það hefur farið gott orð af Olla þarna, einn mesti toppmaður sem ég spilaði með. Þetta er stjórnin sem ákveður þetta einhliða, það er ótrúlegt að Rúnar Páll láti þetta yfir sig ganga.“