Spjallþáttadrottningin Ellen DeGeneres ákvað fyrir nokkru að hætta með vinsæla þætti sína eftir ítrekaðar ásakanir um rudda- og dónaskap. Þessar ásakanir komu frá fyrrum starfsfólki sem og nokkrum gestum sem höfðu komið í þættina.
Þessi gagnrýni gerði að verkum að Ellen fór úr því að vera hvers manns hugljúfi yfir í að vera gífurlega umdeild. Loks þoldi Ellen ekki lengur við og ákvað að segja þetta gott.
Ellen er þó ekki farin alveg úr sviðsljósinu heldur hefur snúið sér aftur að uppistandi. Nýlega var hún með sýningu í Kaliforníu þar sem hún tjáði sig um gagnrýnina.
„Það má segja margt um mig, en ég er ekki andstyggileg,“ sagði Ellen við fullan sal af áhorfendum. Ellen gekkst því við því að sumt í fari hennar gæti farið öfugt ofan í fólk.
„Ég get verið heimtufrek, óþolinmóð og ströng. Ég er sterk kona.“
Ellen hætti með þætti sína árið 2022 en þá höfðu fyrrum starfsmenn stigið fram og sakað hana um að ala á eitruðu vinnuumhverfi. Ellen segir að þetta hafi verið henni lærdómsferðalag. Hún uppgötvaði að hún var frekar lokuð og hleypti öðrum ekki auðveldlega að sér. Hún hefur nú lært að opna sig og gerir það gjarnan við áhorfendur á uppistandi hennar.
Fyrir um mánuði síðan ræddi hún um áhrif þess að vera útskúfað í Hollywood eftir að vera sökuð um eitraðan persónuleika. Hún sagðist forðast fréttir sem mála hana upp sem eitthvað skrímsli. Hún hafi sína bresti en þeir skilgreini hana ekki sem manneskju. Fólk, fjölmiðlar og aðrir þurfi að skilja að fólk hefur margar hliðar. Gagnrýnin hafi gengið nærri sjálfstrausti hennar og það tók hana nokkurn tíma að treysta sér aftur á svið. En nú er hún komin á þann stað að geta hlegið að þessu.
Hún lofar því að kafa dýpra í saumana á þessu drama með tíð og tíma, jafnvel í heilum uppistandsþætti á Netflix, en von er á slíkum í haust.