Fornleifafræðingar gerðu nýlega merka uppgötvun í hlíð einni í Aswan í Egyptalandi. Þar fundu þeir rúmlega 30 fornar grafir. Þær þekja alla hlíðina og veita vísbendingar um fólkið sem bjó eitt sinn þarna en Aswan var lífleg borg þar sem mikil viðskipti voru stunduð. Hún stendur við Níl.

Live Science segir að í gröfunum séu múmíur og virðist sem heilu fjölskyldurnar hafi verið jarðsettar saman. Einnig eru kistur, pappaöskjur (gerðar úr endurunnum papírus eða efni) og fleira.

Patrizia Piacentini, fornleifafræðingur við háskólann í Mílan á Ítalíu, sagði að þetta hafi verið rík borg og íbúarnir hafi stundað viðskipti við Norður-Afríku og aðra hluta Afríku.

Fornleifafræðingar komust á snoðir um grafstæðið 2015 þegar ólöglegur uppgröftur fór fram þar. Í kjölfarið voru fornleifafræðingar fengnir til að hefja uppgröft á svæðinu og hófst hann 2019 og stýrir Piacentini verkinu en um samvinnuverkefni ítalskra og egypskra fornleifafræðinga er að ræða.