Blaðamaðurinn sem fór í taugarnar á Kevin De Bruyne á fréttamannafundi í gær hefur stigið fram og svarað fyrir sig.

De Bruyne var pirraður í kjölfar taps Belga gegn Frökkum í 16-liða úrslitum EM í gær. Belgar töpuðu leiknum 1-0 og eru þar með úr leik. Mikið hefur verið rætt um svokallaða gullkynslóð Belga sem nú er að syngja sitt síðasta.

Meira
Sjáðu myndbandið: De Bruyne verulega pirraður á blaðamanni – „Heimskur“

De Bruyne er hluti af þeirri kynslóð og eftir leik var hann spurður að því hvort það væru ekki vonbrigði að þessi gullkynslóð hefði aldrei komist í úrslitaleik á stórmóti.

„Hvað er gullkynslóð?“ spurði De Bruyne á móti.

„Þið!“ svaraði blaðamaðurinn.

„Við? Og hafa Frakkar, Englendingar, Spánverjar og Þjóðverjar ekki verið með gullkynslóðir? Allt í lagi,“ sagði De Bruyne.

„Heimskur,“ bætti hann við er hann gekk í burtu.

Nú hefur blaðamaðurinn sem um ræðir stigið fram en það er Tancredi Palmeri.

„Haha. De Bruyne kallaði mig heimskan. Þessar gullkynslóðir sem þú nefndir, Frakkar, Englendingar, Spánverjar og Þjóðverjar, hafa allar komist í úrslitaleik,“ skrifar Palmeri á X.

„Dæmigerður fótboltamaður sem vill bara spurningar sem snúa að því hvað hann er frábær. Ofdekraður krakki.“