Svo virðist sem samstarfinu sé lokið hjá Margréti Friðriksdóttur ritstjóri Fréttin.is og Gústafi Adolfi Skúlasyni. Bera þau hvort annað hörðum ásökunum í færslum á Facebook, Margrét í stjórnmálaspjallinu, þar sem hún er einn þriggja stjórnenda hópsins, og Gústaf á eigin síðu.

Aðfararnótt laugardags kl. 4.07 skrifar Gústaf:

„Yfirlýsing sem ég skrifaði í athugasemd á Fréttinni í morgun: Yfirlýsing 29. júní 2024 (uppfært; athugasemdin hefur verið fjarlægð):

Ég bendi lesendum Fréttarinnar á, að samstarfi mínu og Margrétar Friðriksdóttur er lokið. Einhverra hluta vegna á Margrét Friðriksdóttir erfitt með að skilja það og tekur greinar sem ég skrifa á minni síðu gustafadolf.com og birtir á Fréttinni undir sínu nafni. Með því að blekkja lesendur Fréttarinnar til að halda að sú vinna sem lögð er í skrifin sé unnin á Fréttinni er Fréttin að villa á sér heimildir. Slíkt kallast ritstuldur. Af hverju skrifar Fréttin ekki sjálf fréttir um málin? Fréttin er skráður fjölmiðill og þekkir til höfundarréttar samkvæmt lögum. Ég eyddi tíma í að vinna þessa frétt um staðreyndakönnunina vegna kappræðna forsetaframbjóðenda Bandaríkjanna. Fleiri dæmi finnast. Bendi lesendum á gustafadolf.com þar ég birti greinar mínar og fólk getur fylgst með skrifum mínum. Gústaf Skúlason.“

Gústaf hætti í fússi miðjan október hjá Útvarpi Sögu. Hafði hann að eigin sögn verið viðloðandi stöðina í 15 ár og titlaður fréttamaður í Svíþjóð. Gústaf birti bloggfærslu þar sem hann rakti raunir sínar, hallarekstur stöðvarinnar og framgöngu útvarpsstjórans, Arnþrúðar Karlsdóttur, í hans garð.

Svo virðist sem hann hafi ekki verið lengi iðjulaus því 31. október birtist grein í hans nafni á Fréttin. Hefur hann verið ötull síðan og alls brst 554 greinar í eða með hans nafni síðan samkvæmt leitarvél Fréttarinnar. Nafn Gústafs er ekki lengur meðal höfunda á vefsíðunni.

Í gærkvöldi kl. 22.52 skrifaði Margrét færslu í Stjórnmálaspjallið þar sem hún birtir skjáskot af orðaskiptum Gústafs og Ólafs nokkurs. Segir hún þann seinni stunda ófræingarherferð gegn sér og segist íhuga að kæra hann fyrir atvinnuróg. Segir hún Gústaf eiga að vera fullmeðvitaðan um þá vinnu sem hún hefur unnið sjálf. 

„Varið ykkur á svona hættulegu fólki sem gengur um ljúgandi, þessi ógeðfelldi maður Óli Ólafs var með ítrekaða kynferðislega áreitni gegn mér og ég hafði ekki áhuga, þá snérist hann gegn mér og hóf ófræingarherferð eins og þessa. Ég er að íhuga að kæra manninn fyrir atvinnuróg, hann veit ekkert um mína hagi eða hvernig ég vinn, og bara fyndið að hann telji að ég vinni ekki og skrifa greinar sjálf og ansi aumkunarvert að sjá reiða og svekkta karlrembur sem komast ekki upp með að níðast á konum sem eru að gera góða hluti og öfundast yfir því vegna þess að þeim sjálfum hefur ekki tekist neitt afrek í lífinu. Aumingja mennirnir ég finn til með þeim. Gústaf er vel meðvitaður um allar mínar greinar sem ég hef skrifað og viðtöl sem ég hef tekið, þar að auki hef ég menntun sem þessir menn hafa ekki.“