Arda Guler, ungstirni tyrknenska landsliðsins, er vinsælasti leikmaðurinn á EM ef marka má tölur frá Instagram.
Enginn leikmaður á EM hefur eignast fleiri fylgjendur á þeim samskiptamiðli en Guler sem var flottur með Tyrklandi í riðlakeppninni.
Yfir milljón manns hafa fylgt Guler á instagram eftir að mótið hófst en hann er aðeins 19 ára gamall.
Til að setja það í ákveðið samhengi þá er Guler með fleiri auka fylgjendur en stórstjarnan sjálf, Cristiano Ronaldo.
Aðrir risar eins og Jude Bellingham og Kylian Mbappe eru fyrir neðan Guler sem er leikmaður Real Madrid líkt og þeir tveir.
Athygli vekur að annar Tyrki, Kenan Yildiz, kemst á listann en hann er í sjöunda sæti á undan mönnum eins og Toni Kroos og Jamal Musiala.
Þetta minnir mikið á HM 2018 er Rúrik Gíslason, þáverandi landsliðsmaður Íslands, vakti heimsathygli er hann kom inná sem varamaður gegn Argentínu í fyrsta leik okkar manna.