Hagsmunasamtök heimilanna krefjast þess að Seðlabankinn hefji nú þegar vaxtalækkunarferli og skora á peningastefnunefnd að koma saman til aukafundar sem fyrst í því skyni.
Ársverðbólga er nú 5,8% og hefur ekki mælst lægri í tvö og hálft ár eða frá ársbyrjun 2022. Þá voru meginvextir Seðlabanka Íslands 2% en hafa síðan hækkað í 9,25% þar sem þeir hafa nú staðið í 10 mánuði, sem verða að óbreyttu orðnir 12 þegar næsta vaxtaákvörðun er á dagskrá 21. ágúst, þrátt fyrir að verðbólgan hafi lækkað um 43% frá því að hún náði hámarki í febrúar 2023. Kemur þetta fram í tilkynningu frá Hagsmunasamtökum heimilanna.
„Seðlabankinn er fyrir löngu kominn á algjörar villigötur með hávaxtastefnu sinni sem ekki stenst nokkra skoðun auk þess að valda heimilum og fyrirtækjum landsins stórfelldum skaða, sem þau verða lengi að jafna sig á.
Húsnæðisverð hefur verið stærsti drifkraftur verðbólgunnar og eina leiðin til að halda aftur af hækkun þess er að auka framboð húsnæðis. Vegna íþyngjandi fjármagnskostnaðar hefur samt dregið úr nýbyggingum og vaxtastefnan er þannig beinlínis farin að vinna gegn tilgangi sínum.“
Í tilkynningunni segir að „einhver „aumingjaleg” lækkun upp á brot úr prósentustigum væri ekki nóg í fyrsta skrefi heldur þarf að lækka vexti myndarlega strax til að koma í veg fyrir að illa fari, því það tekur langan tíma fyrir áhrif vaxtaákvarðana að koma fram hvort sem þær eru til hækkunar eða lækkunar.
Með vaxtastefnu sinni er Seðlabankinn að kæfa heimili og fyrirtæki landsins og það er kominn tími til að þau fái að ná andanum aftur.
Þau hafa borið nægar byrðar og bankarnir grætt nóg. Hingað og ekki lengra. Við krefjumst lægri vaxta!“
