Ragnar Kristján Stefánsson jarðskjálftafræðingur er látinn, 85 ára að aldri. Ragnar lést í gær á Landspítalanum. Ragnar var einn helsti jarðskjálftafræðingur þjóðarinnar, og landsþekktur sem slíkur, og fékk þannig gælunafnið Ragnar skjálfti.
Árið 2022 gaf hann út bókina Hvenær kemur sá stóri?, sem hlaut Íslensku bókmenntaverðlaun í flokki fræðibóka og rita almenns efnis. Í bókinni gerir hann grein fyrir þróun jarðskjálftafræðanna og fer yfir jarðskjálftasögu Íslands allt frá miðöldum og til síðustu ára. Bókin er byggð á rannsóknum og ævistarfi Ragnars.
Ragnar var einnig þekktur fyrir félagsstörf, hann var meðal stofnenda Vinstri hreyfingarinnar græns framboðs árið 1999 og formaður samtakanna Landsbyggðin lifi á árunum 2003-2008, auk fleiri trúnaðar- og félagsstarfa.
Ragnar skilur eftir sig eiginkonu, Ingibjörgu Hjartardóttur, börn, barnabörn og barnabarnabörn.