Larry Doil Sanders, 55 ára Oklahómabúi, var nýlega dæmdur í ævilangt fangelsi fyrir að hafa myrt vin sinn, Jimmy Knighten, fyrir tveimur árum. Ástæðan fyrir morðinu var að Larry taldi að Jimmy hefði „kallað á Stórfót“ og hafi ætlað honum að éta Larry.

Independent segir að Larry muni eyða því sem hann á eftir ólifað í fangelsi því í dómnum er kveðið á um að hann geti ekki fengið reynslulausn.

Það var 10. júlí 2022 sem lögreglunni í Seminole County og Pontotoc County var tilkynnt um hugsanlegt morð. Lík Jimmy hafði þá fundist.

Lögreglan fékk aðstoð frá ríkislögreglunni í Oklahoma við rannsókn málsins. Larry var fljótlega tekinn til yfirheyrslu. Hann sagði að hann og Jimmy hefðu verið vinir og játaði að hafa drepið hann.

Hann sagði að þeir hafi farið saman í veiðiferð  þann 9. júlí. Til deilna kom þeirra á milli og sagðist Larry þá hafa slegið Jimmy og síðan kyrkt hann. Aðspurður sagðist hann hafa drepið Jimmy því hann hafi „kallað á Stórfót“ og ætlað honum að drepa Larry og éta.

Stórfótur er goðsagnavera sem er sögð lifa í skógum í Norður-Ameríku.

Þegar Larry skýrði frá málinu fyrir dómi sagðist hann ekki aðeins telja að Jimmy hafi kallað á Stórfót, heldur hafi hann séð þessa stóru veru nærri veiðistaðnum þeirra.