Í síðustu viku skutu suðurkóreskir hermenn aðvörunarskotum að norðurkóreskum hermönnum sem fóru yfir línuna sem skilur ríkin að. Þetta var í þriðja sinn í þessum mánuði sem aðvörunarskotum var skotið að norðurkóreskum hermönnum við landamærin. Suðurkóreumenn segja þó að líklega hafi um mistök verið að ræða hjá norðanmönnum því þeir hafi snúið snarlega við þegar skotið var á þá.

En þessi tilvik eru hluti af aukinni spennu á milli Kóreuríkjanna og ekki dró það úr spennunni að Vladímír Pútín, Rússlandsforseti, heimsótti Kim Jong-un, einræðisherra í Norður-Kóreu, í síðustu viku.

Í kjölfar heimsóknarinnar fordæmdu suðurkóresk stjórnvöld einn af þeim samningum sem Pútín og Kim Jong-un skrifuðu undir. Þetta er samningur þar sem ríkin skuldbinda sig til að veita hvort öðru „hernaðarlega aðstoð“ ef ráðist verður á þau.

Segja suðurkóresk yfirvöld að þau líti á þetta sem ógn við öryggi Suður-Kóreu og nú muni þau taka til íhugunar hvort þau eigi að láta Úkraínu vopn í té.

Pútín frétti auðvitað strax af þessu og sagði að það verði stór mistök hjá Suður-Kóreu ef landið ákveður að láta Úkraínu vopn í té.  Rússnesk stjórnvöld muni  þá taka ákvarðanir sem „muni varla gleðja suðurkóreska ráðamenn“.

Suður-Kórea hefur stutt Úkraínu með mannúðaraðstoð og fjárframlögum fram að þessu en hefur ekki viljað láta vopn af hendi.