Sálfræðideild Háskólans í Reykjavík auglýsir eftir þátttakendum í rannsókn á notkun dómsals í sýndarveruleika fyrir þolendur kynferðisofbeldis.
Tilgangur rannsóknarinnar er skoða og meta mögulegt úrræði fyrir þolendur kynferðisofbeldis, og meta hvort sýndarveruleiki gagnist við að minnka vanlíðan og kvíða sem þolendur kynferðisofbeldis geta haft gagnvart því að fara í raunverulegan dómsal, eins og segir á vef skólans.
Sýndarveruleika umhverfi hefur verið þróað sem byggir á dómsal við Héraðsdóm Reykjavíkur. Þolendum kynferðisofbeldis verður boðið að prófa og viðbrögð þeirra metin með spurningalistum, viðtali og líffræðilegum mælingum. Þátttaka í rannsókninni felur í sér þrjá þætti, að mæta í tvö skipti í Háskólann í Reykjavík við Menntaveg 1, 102 Reykjavík, og svara spurningalistum í gegnum tölvupóst í eitt skipti.
Leitað er að þátttakendum sem eru 18 ára eða eldri, hafa verið beittir kynferðisofbeldi einhvern tíma á ævinni, og hafa ekki farið í dómsal vegna kynferðisbrots gegn þeim.
Ábyrgðarmaður rannsóknarinnar er Rannveig S. Sigurvinsdóttir, dósent við sálfræðideild Háskólans í Reykjavík (HR).
Nánari upplýsingar um rannsóknina má lesa hér.