„Það er ólíðandi að tveir sérsveitarmenn séu á sveimi í kringum þingsalinn í hvert sinn sem forsætisráðherra mætir á Alþingi. Þessi lögregluvæðing í kringum ríkisstjórnina er ógnvænleg þróun sem þarf að spyrna við. Enn verra er að heyra svör forseta Alþingis, sem segir að lögregla verði að fá að ráða þessu. Það er rangt: Forseti Alþingis ber sjálfur þessa ábyrgð og á að standa með sjálfstæði og stjórnarskrárbundinni friðhelgi Alþingis,“ sagði Andrés Ingi í færslu á Facebook-síðu sinni á föstudag í síðustu viku.
Í Morgunblaðinu í dag er rætt við Fjölni Sæmundsson, formann Landssambands lögreglumanna, þar sem hann kveðst undrast þessa skoðun þingmannsins. Lögreglumenn hafi árum saman staðið vaktina í Alþingishúsinu, Stjórnarráðinu og á Bessastöðum og það sé ekkert nýtt við að lögregla gæti öryggis ráðamanna.
„Nauðsynlegur viðbúnaður er metinn af ríkislögreglustjóra og Andrés Ingi veit að sjálfsögðu ekki forsendur hans. Það verður að segjast hreint út – fyrir okkur lögreglumenn eru þessi ummæli þingmannsins algerlega ömurleg. Þetta er jú ekkert annað en fólk sem er að sinna sínum störfum. Það er ekki eins og lögreglan sé að biðja sérstaklega um að vera þarna,“ segir hann við Morgunblaðið.
„Svona ummæli gera fátt annað en að skapa úlfúð nema þetta séu einhverjar atkvæðaveiðar. Ég skil vel að fólk vilji búa í friðsömu samfélagi en þá verður auðvitað að vinna að því. Og Andrés Ingi er í aðstöðu til þess,“ segir Fjölnir.
Andrés segir við Morgunblaðið að lögreglumenn megi vel sitja inni á kaffistofu Alþingis eins og bílstjórar ráðherra gera. Þegar ráðherra sé kominn inn í þingsal setðji engin ógn að honum.
„Þessir lögreglumenn sem hafa það hlutverk sérstaklega að gæta öryggis forsætisráðherra hafa ekkert hlutverk á annarri hæð þinghússins í kringum þingsalinn. Þess vegna er eðlilegt að þeir, líkt og aðrir fylgihnettir ráðherrans, séu bara frammi í kaffi.“
