Líneik Anna Sævarsdóttir, þingmaður Framsóknaflokksins, segir að það eigi að vera í höndum löggjafans en ekki verslana að breyta því fyrirkomulagi áfengissölu sem hér hefur tíðkast, að ÁTVR hafi einkaleyfi. Þetta kemur fram í aðsendri grein á Vísir.is:
„Hér á landi hefur ÁTVR einkaleyfi til afhendingar og smásölu áfengis. Markmið laga um verslun með áfengi eru m.a. að skilgreina umgjörð um smásölu áfengis sem byggist á bættri lýðheilsu, samfélagslegri ábyrgð og vernd ungs fólks. Þannig er einkasölufyrirkomulag áfengis liður í forvarnastefnu og lögin eru skýr sama hversu oft sem því er haldið fram að þau séu óskýr. Ef breyta á sölufyrirkomulaginu hér á landi þarf það að gerast eftir lýðræðislega umræðu og lagasetningu, slík ákvörðun er ekki í höndum verslana án samhengis við forvarnarstefnu.“
Mikið hefur kveðið að netsölu á áfengi hjá einkaaðilum og skiptar skoðanir eru um hvort sú starfsemi sé í samræmi við lög. Líneik bendir á að aukið aðgengi að áfengi hafi slæm áhrif á heilsufar einstaklinga og neikvæðar félagslega afleiðingar. Hún bendir á að áfengisneysla fari vaxandi hér á landi og brýnt sé að sporna við fótum og draga úr aðgengi:
„Stýrt aðgengi, há skattlagning ásamt fræðslu og samvinnu skólasamfélaga í gegnum íslenska forvarnarmódelið hafa skilað þessum árangri. Hættan er að missa þetta allt niður – málið er einfalt, það þarf að fara að áfengislögum og stöðva „gervinetsölu“ annars slítum við forvarnarvefinn.“
Greinina í heild má lesa hér.