Lögreglan á höfuðborgarsvæðinu greinir frá því í tilkynningu að lögreglumenn hafi farið með starfsmönnum Skattsins á veitingastað í miðborginni í morgun vegna gruns um að þar væru leyfamál ekki í lagi, auk þess sem grunur lék á þar væru starfsmenn sem kynnu að vera þolendur mansals. Er þarna vísað til veitingastaðarins Gríska húsið sem hefur verið í fréttum í dag vegna aðgerða lögreglu. Kemur fram í tilkynningunni að þrír menn voru handteknir og er lögregla að rannsaka hlut hvers og eins í málinu.
Ennfremur segir í tilkynningunni:
„Lögreglan á höfuðborgarsvæðinu og Skatturinn fóru nýverið í sameiginlegt eftirlit á rúmlega tuttugu matsölustaði í umdæminu til að kanna hvort öll tilskilin leyfi væru þar fyrir hendi, bæði er varðar reksturinn og starfsmenn.
Svo reyndist vera i flestum tilvikum, en fjórir staðir voru þó án starfsleyfis og einn án smásöluleyfis. Tveir starfsmenn reyndust jafnframt ekki hafa réttindi til vinnu hérlendis.
Við eftirlitið kom einnig í ljós að allmargir starfsmenn voru ekki á launaskrá.“