Tíu ár eru síðan Hosier hlaut dóm fyrir að drepa fyrrverandi elskhuga sinn Angelu Gilpin, og eiginmann hennar, Rodney, árið 2009. Mike Parson, ríkisstjóri Missouri, hafnaði í fyrradag beiðni verjenda Hosier um að fresta aftökunni og fór hún því fram á tilsettum tíma.
Sjá einnig: Nú á að drepa mig fyrir glæp sem ég framdi ekki
Banvænum skammti af svefnlyfinu Pentobarbital var dælt í líkama Hosiers og hætti hann að hreyfa sig nokkrum sekúndum síðar. Hann var svo úrskurðaður látinn klukkan 18:11 að staðartíma í gærkvöldi.
Hosier og Angela höfðu átt í ástarsambandi á meðan Angela var enn gift eiginmanni sínum, en hún batt endi á sambandið til að freista þess að laga hjónabandið. Samkvæmt saksóknurum var Hosier allt annað en sáttur við þá ákvörðun.
Hosier neitaði staðfastlega sök í málinu og var bent á það í umfjöllun fjölmiðla að saksóknarar hefðu ekki búið yfir neinum beinum sönnunargögnum um að hann hefði verið á vettvangi þegar morðin voru framin.
„Það eru allir hræddir við dauðann. Það er eitthvað að þeim sem segjast ekki vera hræddir við dauðann,“ sagði hann í viðtali sem hann veitti breska blaðinu Mirror í fyrradag. Hann sagði að trúin og samskipti við vini og vandamenn hefðu hjálpað honum að halda geðheilsunni á síðustu árum og vitneskja hans um það að hann framdi engan glæp.
„Ég veit að ég er saklaus. Ég var ekki á staðnum og drap ekki þetta fólk. Punktur.“