Mail Online vísar í könnun sem BT Group stóð fyrir fyrr á þessu ári og bar niðurstöðurnar saman við sambærilega könnun frá árinu 2000. Kannanir áttu það sameiginlegt að spyrja börn, 11-15 ára, út í það hvað þau vildu helst gera þegar þau yrðu stór.
Árið 2000 sögðust flestar stúlkur helst vilja starfa við eitt af eftirfarandi í þessari röð: Kennari, læknir, lögfræðingur, sálfræðingur, hjúkrunarfræðingur eða ljósmóðir, viðskiptastjóri, dýralæknir, blaðamaður, ritari eða hárgreiðslukona.
Í könnuninni sem gerð var fyrr á árinu nefndu hins vegar flestar stúlkur eftirfarandi:
Hjúkrunarfræðingur, tískuhönnuður, lögfræðingur, áhrifavaldur eða skemmtikraftur, tölvuleikjahönnuður, snyrtifræðingur eða hárgreiðslukona, læknir, sjá um samfélagsmiðla fyrir fyrirtæki, atvinnumaður í íþróttum eða hugbúnaðarverkfræðingur.
Drengir sem spurðir voru að þessu sama árið 2000 sögðust flestir vilja verða viðskiptastjórar, vinna við upplýsingatækni, verkfræðingar, læknar, atvinnumaður í íþróttum, kennari, lögfræðingur, bifvélavirki, arkitekt eða lögregluþjónn.
24 árum síðar nefndu flestir drengir eftirfarandi störf: Tölvuleikjahönnuður, atvinnumaður í íþróttum, hugbúnaðarverkfræðingur, sérfræðingur í upplýsingatækni, áhrifavaldur eða skemmtikraftur, smiður, gagnasérfræðingur, læknir, lögfræðingur eða arkitekt.
Í umfjöllun Mail Online kemur fram að innleiðing svokallaðra STEM-greina í breskt skólakerfi árið 2001 virðist hafa haft tilætluð áhrif, einkum meðal drengja. Markmiðið var að auka vægi fræðigreina á sviði verkfræði, stærðfræði, raunvísinda og náttúruvísinda þar sem hugvitið fær að njóta sín.
Victoria Johnson, sérfræðingur hjá BT Group, segir að niðurstöðurnar sýni að það sé enn útbreitt meðal stúlkna að tæknigeirinn sé ekki endilega fyrir þær. „Niðurstöðurnar sýna að við höfum enn verk að vinna þegar kemur að því að hvetja stúlkur til að fara í tækninám,“ segir hún.
