Aðalmeðferð er hafin við Héraðsdóm Reykjaness í máli þar sem þrír menn eru ákærðir vegna húsbrots og skotárásar inni á heimili fjölskyldu á Hvaleyrarholti í Hafnarfirði á aðfangadagskvöld árið 2023.
Málið vakti mikinn óhug í samfélaginu en aðalsakborningurinn er ákærður fyrir tilraun til manndráps, húsbrot, hættubrot og vopnalagabrot með því að hafa ásamt öðrum manni ruðst grímuklæddur inn á heimilið. Er hann sagður hafa skotið þar án viðvörunar samtals sex skotum úr skammbyssu að níu ára stúlkubarni og föður hennar en faðirinn skýldi barninu á meðan skothríðinni stóð. Fjögur skot höfnuðu á vegg hægra megin við inngang herbergisins þar sem þau breyttu um stefnu inn í stofuna þannig að ákoma myndaðist á glerplötu sófaborðs og innra byrði rúðu brotnaði. Eitt skot fór í gegnuum hægri hurðarstaf og inn í svefnherbergi barnsins þar sem það endaði á milli miðstöðvarofns og gluggakistu.
Í ákæru er skotmaðurinn sakaður um að hafa á ófyrirleitinn hátt stofnað lífi og heilsu allra í íbúðinni í augljósan háska. Barnið hlaut eymsli í andliti eftir að óþekkt brak hafnaði andliti hennar í kjölfar þess að eitt skotið hafnaði á hörðum fleti.
Tveir aðrir menn eru ákærðir fyrir hlutdeild í brotum skotmansnins. Einn er sakaður um að hafa liðsinnst honum við undirbúning og framkvæmd brotsins með því að ryðjast grímuklæddur með honum inn í íbúðina og með því að hafa greitt þriðja aðila 80.000 krónur fyrir að aka þeim á staðinn, ásamt því að skilja farsíma sinn eftir, taka með föt til skiptanna og aðstoða við að skipta um númeraplötur á bíl sem mennnirnir voru á, allt til að villa um fyrir lögreglu.
Sést á lýsingum í ákæru að glæpurinn var þaulskipulagður af hálfu mannanna.
Þriðji maðurinn er síðan ákærður fyrir hlutdeild í brotinu með því að hafa ekið mönnunum á vettvang gegn 80 þúsund króna greiðslu.
Skotvopnið sem notað var í árásinni er skammbyssa af gerðinni Colt, gerð fyrir 45 kalíbera skot.
Blaðamenn frá DV og Vísir.is voru mættir í dómsal rétt fyrir aðalmeðferð í morgun. Dómari tilkynnti þeim við upphaf þinghaldsins að þinghaldið væri lokað og urðu þeir frá að hverfa. Hafði þetta ekki komið fram í samskiptum við héraðssaksóknara við vegna afhendingu ákæru né er þetta tekið fram í dagskrá dómstólsins. Persónuvernd þolenda er ástæðan fyrir lokun þinghaldisns en á meðal þeirra er, eins og áður hefur komið fram, 9 ára gamalt barn.
