Slys varð um tvöleytið í dag þegar landgangur Herjólfs fór yfir ristina á ungri konu við Hafnarfjarðarhöfn. Flytja þurfti hana með sjúkrabíl í burtu. Lögreglan segir málið í rannsókn.

Rúllaði yfir ristina

Sigurður Holm Gunnarsson, fyrrverandi forstöðumaður hjá Barnavernd Reykjavíkur, greinir frá slysinu á samfélagsmiðlum. Sakar hann skipuleggjendur hátíðarinnar, sem auglýst er hjá Hafnafjarðarbæ, um að sinna ekki öryggisskyldu sinni.

„Skipuleggjendur sjómannadagsins í Hafnarfirði með allt niðrum sig. Fólki var boðið að skoða Herjólf. Löng röð við bryggjuna og ekki nokkur maður að fylgjast með. Landgangurinn rúllaði fram og til baka í veðrinu,“ segir Sigurður. „Ung kona sem beið eftir að komast í skipið varð undir landganginum sem rúllaði yfir ristina á henni. Þrátt fyrir öskur var enginn til að bregðast við. Það var enginn að fylgjast með.“

Sigurður og nokkur önnur vitni að slysinu hlupu til og komu til aðstoðar. Sumir fóru og fundu sjúkrabíl á meðan aðrir hlúðu að konunni.

„Allan tímann var engan að sjá sem var á vaktinni. Enginn starfsmaður eða sjálfboðaliði sjáanlegur. Langur tími leið þar til lögregla kom og á meðan var enginn, nema nokkrir óbreyttir borgarar, að fylgjast með og vara aðra við stórhættulegum landganginum,“ segir Sigurður.

Var konan loks flutt með sjúkrabíl til aðhlynningar. Sigurður segir skipulagið ekki til fyrirmyndar og öryggi hafi ekki verið tryggt.

Ekki hluti af dagskránni

Lögreglan hafði einnig aðkomu að málinu. „Lögregla fór á staðinn og athugað hvort það væri nægilega vel gengið frá,“ segir Ásgeir Þór Ásgeirsson, aðstoðarlögreglustjóri hjá lögreglunni á höfuðborgarsvæðinu. Málið sé til rannsóknar hjá lögreglunni.

Ásgeir segir hins vegar að ekki hafi verið nein hátíðardagskrá um borð í Herjólfi.

„Fyrir misskilning fór fólk að streyma um borð,“ segir hann. „Þarna var komið talsvert af fólki um borð í skip sem var ekki hluti af hátíðardagskránni. Það var talsvert af fólki á landganginum sem er á rúllum og rúllar eftir hreyfingu skipsins. Ung kona fékk rúlluna upp á ristina þar sem hún stóð við hann. Þetta eru talsvert þyngsli þannig að hún þurfti að fara upp á slysadeild.“