Guðmundur Andri Tryggvason var í byrjunarliði Vals í gær þegar liðið vann 5-1 sigur á Stjörnunni. Hann fór af velli í stöðunni 0-0 vegna meiðsla.
Guðmundur er að hefja sitt fjórða tímabil í herbúðum Vals eftir að hafa komið heim úr atvinnumennsku.
„Guðmundur Andri byrjaði leikinn, á meðan hann naut við þá skoraði Valur ekkert. Þegar hann fór út liðu nokkrar sekúndur þangað til Valur skoraði,“ sagði Kristján Óli Sigurðsson sérfræðingur Þungavigtarinnar í þætti dagsins.
Kristján segir að Valur hafi borgað fleiri milljónir fyrir Guðmund. „Verstu kaup í sögu íslenska boltans, kostaði 12 milljónir og ekki gert rassgat.“
Kristján hafði sett þessa skoðun sína fram á X-inu hans Elon Musk þegar leikurinn var í gangi. „Vinir hans eru núna byrjaðir að svara mér á Twitter, bið þá að grjóthalda kjafti í eitt skipti fyrir öll. Hann veit það manna best sjálfur.“
„Verið mikið meiddur en heilt yfir ömurleg kaup.“
