Börn og ungmenni funduðu með bæjarstjórn Kópavogs á þriðjudaginn og kynntu fyrir bæjarfulltrúum tillögur sínar að betra skólastarfi.

Þangað voru mættir fulltrúar grunnskólabarna, sem eru kallaðir barnaþingmenn, með sjö tillögur sem eru afrakstur skólaþinga í grunnskólum bæjarins og Barnaþings sem var haldið í mars. Barnaþing vann úr tillögunum og setti í umsögn og kosningu meðal barna bæjarins. Eins mættu fulltrúar ungmennaráðs með fjórar tillögur sem voru afrakstur ungmennaþings.

Þrjár tillögur barnaþingmanna, sem nutu mestrar hylli í nemendakönnum voru styttri skóladagur, fleiri vettvangsferðir og að boðið verði upp á meiri aðstoð í heimanámi fyrir alla nemendur. Aðrar tillögur voru aukin áhersla á listir og verklegt nám,  jafnt aðgengi, símareglur og fartölvur í stað spjaldtölva.

Fulltrúar ungmennaráðs lögðu til betri aðstöðu og viðhald sparkvalla, bætta vellíðan nemenda með aukinni fræðslu, öryggi á bílastæðum og meiri flokkun.

Samkvæmt tilkynningu Kópavogsbæjar fögnuðu bæjarfulltrúar tækifærinu að fá að funda með börnum og ungmennum og voru til svara eftir að hver og ein tillaga hafði verið borin upp. Tillögurnar verða svo settar í farveg innan sveitarfélagsins.