„Úff, þegar ég sá í hvað stefndi. Þegar United tryggði sér sætið í úrslitaleikinn gegn City þá hafði ég ekki mikla trú. En þetta var vel uppsettur leikur hjá þeim,“ sagði Bjarni Benediktsson, forsætisráðherra í samtali við Chess after Dark.
Bjarni fór víða yfir sviðið í þættinum en eitt af þvi sem var rætt voru málefni Manchester United en Bjarni er stuðningsmaður liðsins.
Ráðherrann missti af úrslitaleik enska bikarsins um síðustu helgi þegar United varð enskur bikarmeistari eftir sigur á grönnum sínum í Manchester City.
„Ég sá þetta því miður ekki, ég var að veiða í vatni á Suðurlandi. Ég fylgdist með,“ sagði Bjarni.
Þegar hann kom heim úr veiðinni ákvað hann þó að skoða leikinn. „Ég hef séð bróðurpart leiksins eftir á, öll helstu atriðin. Virðist hafa verið margt mjög flott, tölfræðin segir það líka.“
Bjarni átti sjálfur flottan feril sem knattspyrnumaður en þurfti að hætta snemma vegna meiðsla.
