Það er óhætt að segja að það stefni í æsispennandi forsetakosningar á laugardaginn ef miða má við niðurstöðu nýrrar skoðanakönnunar Prósents. Samkvæmt henni eru þær Halla Hrund Logadóttir, Halla Tómasdóttir og Katrín Jakobsdóttir í einum hnapp á toppnum. Ef niðurstöður kosninganna verða í samræmi við þessa könnun er ljóst að örfá atkvæði geta ráðið úrslitum, svo litlu munar á fylgi frambjóðendanna.

Prósent gerði könnunina fyrir Morgunblaðið sem skýrir frá henni í dag. Hún var gerð frá því á þriðjudaginn og þar til í gærmorgun.

Fylgi Höllu Hrundar mælist 21%, fylgi Höllu Tómasdóttur mælist 20,2% og fylgi Katrínar Jakobsdóttur 20,1%.

Þetta er ekki marktækur munur, tölfræðilega séð en vikmörkin eru frá 18,1% upp í 23,2%.

Fylgi Baldurs Þórhallssonar mælist 16,9%. Þetta er marktækt minna fylgi en fylgi Höllu Hrundar en hins vegar skarast efri vikmörk Baldurs við neðri vikmörk Höllu Tómasdóttur og Katrínar og á Baldur því möguleika á að blanda sér í baráttuna nú á lokasprettinum.

Hægt er að lesa nánar um könnunina í Morgunblaðinu í dag.