Jóhann Már Helgason, sparkspekingur með meiru, var gestur í nýjasta þætti af Íþróttavikunni á 433.is. Helgi Fannar Sigurðsson og Hrafnkell Freyr Ágústsson hafa umsjón með þættinum.

Andri Lucas Guðjohnsen er á leið til Gent frá danska félaginu Lyngby. Hann var á láni hjá Lyngby í vetur en félagið festi svo kaup á honum nýlega.

„Þetta er fáránlega vel gert. Þeir eru greinilega þannig að þeir eru til í að gefa leikmönnum á þessum aldri tækifæri til að blómstra. Þarna taka þeir bet sem gengur gjörsamlega upp. Þetta var leikmaður sem var kannski ekki að fá tækifærin sem hann vildi fá. Hann fer svo þangað og brillerar. Maður elskar að sjá svona gerast og liðin stórgræða á þessu,“ sagði Jóhann, en Lyngby fær tæpan hálfan milljarð íslenskra króna fyrir Andra.

Freyr Alexandersson fékk Andra til Lyngby áður en hann fór svo sjálfur til Kortijk í Belgíu.

„Freysi á auðvitað risastóran þátt í þessu, hann heldur áfram að gefa. Þetta er hrikalega vel gert hjá Lyngby og flott skref hjá honum,“ sagði Jóhann.