Það hefur vakið nokkra athygli að Age Hareide landsliðsþjálfari Íslands heldur nánast enga blaðamannafundi á Íslandi. Hann dvelur frekar í Noregi þar sem hann býr frekar en að koma til landsins og ræða málin.

Hareide hefur undanfarið tekið fundina sína í gegnum Zoom, eitthvað sem hefur ekki tíðkast áður hjá KSÍ þrátt fyrir að nokkrir erlendir þjálfarar hafi verið með liðið síðustu ár.

„Sagði Age Hareide eitthvað skemmtilegt upp í rúmi heima hjá sér?,“ sagði Ríkharð Óskar Guðnason íþróttafréttamaður á Stöð2 Sport í Þungavigtinni í dag.

Kristján Óli Sigurðsson telur þetta ekki góða þróun. „Þetta er meiri aumingjaskapurinn, Hamren og Laberback báru virðingu fyrir þessu starfi. Þeir voru ekki bara að telja norskar krónur sem þeir fá millifærðar inn á reikninginn sinn.“

Íslenska liðið er á leið í leiki við England og Holland og telur Mikael Nikulásson að þetta eigi ekki að vera í boði. „Lagerback náði líka árangri og Hamren gerði fína hluti. Þetta er bara ekki boðlegt, Englandi og Hollandi langaði að spila við Ísland til að reyna að fá sjálfstraust. Við fáum þessa leiki og Hareide er bara upp í rúmi heima hjá sér í ömurlegum gæðum á Zoom eins og það sé Covid, þetta er bara glatað. Það er ekki eins og hann hafi náð frábærum árangri með þetta landslið.“

Kristján Óli segir að þarna hafi verið kjörið tækifæri til að kynna nýjan aðstoðarþjálfara. „Davíð Snorri að taka við og takið þennan fund saman,“ sagði Kristján.