Kvöld eitt árið 2006 hélt Richards uppistand á Laugh Factory-uppistandsklúbbnum þegar hann talaði með niðrandi hætti til svartra. Þetta átti eftir að hafa miklar afleiðingar í för með sér fyrir hann og hefur Richards varla sést á skjánum eða á sviði síðan þá.
Mun hann meðal annars koma inn á þetta atvik í ævisögu sinni sem er væntanleg í verslanir í byrjun júnímánaðar.
„Ég sá strax eftir því sem ég sagði,“ segir Richards, sem er orðinn 74 ára, í nýju viðtali við People. Hann segir að með því að opna sig um þetta núna sé hann ekki að leita leiða til að komast aftur á svið eða í sjónvarp.
„Ég var reiður á þessum tíma og reiðin getur verið sterkt afl. En þetta gerðist og í stað þess að hlaupa frá þessu þá reyndi ég að læra af þessu. Það hefur ekki verið auðvelt,“ sagði hann.
Hann bætir við að ráðgjafar hans í krísustjórnun hafi ráðlagt honum á sínum tíma um hvernig best væri að bregðast við til að takmarka skaðann. „En skaðinn var inni í mér og það var kominn tími til að komast að því hvar upptök þessarar reiði voru,“ segir hann.
Richards segist ekki vera rasisti og ekki hafa neitt á móti svörtu fólki. „Maðurinn sem sagði við mig að ég væri ekki fyndinn hafði sagt nákvæmlega það sem ég hafði sagt við sjálfan mig í langan tíma. Ég var niðurlægður og mig langaði að niðurlægja hann.“
Í bók sinni mun Richards segja frá góðum stundum á ferli sínum í bland við þær slæmu. Hann hefur lengi barist við lágt sjálfsmat.
„Ég hafnaði því að fá stjörnu á frægðargangstéttina í Hollywood af því að mér fannst ég ekki eiga það skilið. Ég sagði tvisvar nei þegar ég var beðinn um að stjórna Saturday Night Live. Mér fannst ég ekki nógu góður til þess. Ég var aldrei fyllilega ánægður með frammistöðu mína í Seinfeld. Frægðin gerði það að verkum að óöryggi mitt margfaldaðist,“ segir hann.
