Vladímír Pútín, Rússlandsforseti, stokkaði upp í ríkisstjórn sinni í síðustu viku og færði menn á milli embætta. En hann er ekki hættur því á þriðjudaginn rak hann einn ráðherra og þykir sú ráðstöfun benda til að verið sé að breyta um stefnu í stríðsrekstrinum í Úkraínu.

Það þóttu mikil tíðindi í síðustu viku þegar Pútín setti hagfræðing í embætti varnarmálaráðherra en sá heitir Andrey Belousov og er gamall bandamaður Pútíns. Þykir setning hans í embættið benda til að Pútín sé að undirbúa sig undir langvarandi stríð og sé að setja efnahagskerfi landsins í stríðsgír til að vera búinn undir árekstra við NATÓ.

Á þriðjudaginn rak hann Yury Sadovenko, hershöfðingja, úr embætti aðstoðarvarnarmálaráðherra og skipaði í hans stað Oleg Savelye í embættið. Hann er fyrrum aðstoðar efnahagsráðherra og núverandi ríkisendurskoðandi.

Bandaríska hugveitan The Institute for the Study of War segir í umfjöllun um þetta að rússneskir herbloggarar segi að tilnefning Savalyev sé í samræmi við tilraunir Kremlverja til að styrkja stríðsefnahaginn. Ástæðan er að Savelyev á sér fortíð í hagfræði og reynslu af að sinna endurskoðun á varnarmálum, þjóðaröryggismálum og löggæslumálum.