Sjónvarpsþátturinn Íþróttavikan kemur út alla föstudaga á 433.is og á Hringbrautarrás Sjónvarps Símans. Helgi Fannar Sigurðsson og Hrafnkell Freyr Ágústsson hafa umsjón með þættinum en gestur þeirra að þessu sinni var enginn annar en Auðunn Blöndal.

Auddi, eins og hann er gjarnan kallaður, heldur með Manchester United í enska boltanum en tímabil í ár hefur vægast sagt verið slakt. Liðið getur bjargað tímabilinu að einhverju leyti í úrslitaleik enska bikarsins gegn Manchester City um næstu helgi.

„Þetta er viðbjóður, það er orðið. Það er í fyrsta sinn á þessu tímabili sem ég hef horfi á United og mér líður bara eins og þeir séu að fara að tapa. Það eru svo margir leikmenn þar sem bjartsýnin er gjörsamlega farin. Þetta er viðbjóðslegt tímabil og sem betur fer er það að verða búið,“ sagði Auddi í þættinum.

Nú er Sir Jim Ratcliffe tekinn við stjórnartaumunum í knattspyrnuhlið rekstursins á United og er þegar farinn að taka til. Audda líst vel á það.

„Það er loksins hægt að vera bjartsýnn sem United maður því það er verið að hreinsa til þarna uppi. Það eru komnir menn sem vita hvað þeir eru að gera, ekki bara auglýsa einhverjar núðlur milli leikja. Vonandi sjáum við á næstunni breytingu á United í heild sinni, æfingasvæðinu og öllu.“

Þó Auddi vilji tiltekt hjá félaginu vill hann halda stjóranum Erik ten Hag. Fær hann gjarnan bágt fyrir þessa skoðun sína þegar hann ræðir við félaga á spjallgrúppum.

„Það er mikið gert grín að mér, ég er sá eini sem vill halda Ten Hag. Það er ekki af því hann er sköllóttur eins og menn vilja meina þarna á spjallinu,“ sagði Auddi og hló.

Auddi er tryggur að eðlisfari og vildi líka halda Ralf Rangnick sem stjóra á sínum tíma.

„Bayern vildi Rangnick og hann er að gera frábæra hluti með Austurríki. Hvenær ætla menn að átta sig á því að þetta er ekki þjálfarinn sem er að rústa öllu hjá United?“

Auddi segir að það sé ýmislegt sem megi hrósa Ten Hag fyrir.

„Það er eitt sem er aldrei minnst á með Ten Hag. Það er hann sem gefur Garnacho og Kobbie Mainoo sénsinn. Hann er að láta unga leikmenn spila og þeir dýrka hann. Það þarf að halda Bruno og ungu leikmönnum og halda Ten Hag.“

Umræðan í heild er í spilaranum.

Íþróttavikan er í boði Bola léttöl og Lengjunnar