Sjónvarpsþátturinn Íþróttavikan kemur út alla föstudaga á 433.is og á Hringbrautarrás Sjónvarps Símans. Helgi Fannar Sigurðsson og Hrafnkell Freyr Ágústsson hafa umsjón með þættinum en gestur þeirra að þessu sinni var enginn annar en Auðunn Blöndal.

Lokaumferð ensku úrvaldseildarinnar er framundan þar sem enn er spenna milli Manchester City og Arsenal um Englandsmeistaratitilinn. Auddi á slæma minningu frá baráttu við City í lokaumferðinni en hans menn í Manchester United misstu af titlinum 2012 á lokaandartökunum þegar City sneri leik sínum við QPR í sigur.

„Þegar Aguero skorar fyrir City, það er með verri dögum á ævi minni. Þetta var þannig að það var eitthvað afmæli kvöldið áður. Við vorum að horfa á þetta á Úrillu Górillunni og þetta var eitthvað svo vonlaust því þetta var QPR og City á heimavelli,“ sagði Auddi.

Svo lenti City undir og United kláraði sitt gegn Sunderland. Vonin var heldur betur til staðar.

„Svo fær maður sér afréttara, er kominn í tvo og svo þegar þetta er orðinn séns fer bjórinn svo hratt niður hjá mér að það er eins og ég sé að drekka vatn eftir maraþon. Mig minnir að við höfum jinxað þessu þannig að það hafi verið búið að panta út að borða og eitthvað kjaftæði.“

Draumurinn varð hins vegar að martröð.

„Svo þegar þeir skora þessi tvö mörk og snúa þessu við labba ég út, ég bjó einn og fór heim til mín. Ég nennti ekki að horfa á sjónvarpið, nennti ekki að fara á netið. Ég nennti ekki að gera neitt og það var farið að renna af mér. Þetta var viðbjóðslegur dagur. Þetta var með verri dögum sem ég hef átt, 100 prósent,“ sagði Auddi að endingu um málið.

Umræðan í heild er í spilaranum.

Íþróttavikan er í boði Bola léttöl og Lengjunnar